மீனம் (பூரட்டாதி 4-ஆம் பாதம் முதல், உத்திரட்டாதி, ரேவதி முடிய)

மீனம்
(பூரட்டாதி 4-ஆம் பாதம் முதல், உத்திரட்டாதி, ரேவதி முடிய)

மீன ராசி அன்பர்களே!

இதுவரை உங்கள் ராசிக்கு 9-ல் இருந்த ராகு இப்போது 8-ஆம்  இடத்திலும்; 3-ல் இருந்த கேது இப்போது 2-ஆம் இடத்திலும்  மாறியிருக்கிறார்கள்.

ஏற்கெனவே ராகு- கேது இருந்த இடங்கள் ஓரளவுக்கு பரவாயில்லை என்றே சொல்லவேண்டும். அதனால் ஒரு சில தடை தாமதமான பலன்களையும் காரியத்தடைகளையும் தவிர, பெரிய பாதிப்புகளைச் சந்திக்கவில்லை என்று சொல்லலாம். இன்னும் சொல்லப்போனால் ஒரு சில மீன ராசிக்காரர்களுக்கு சில நல்ல காரியங்களையும் கடந்த கால ராகுவும் கேதுவும் செய்திருக்கிறார்கள் என்பதும் உண்மைதான். ஒரு சிலருக்கு சொந்த இடம், வீடு, வாசல், மனை, புதிய வாகன யோகத்தையும் தந்துள்ளது. ஒரு சிலருக்கு நீண்டகாலமாகத் தடைப்பட்ட பிள்ளையின் கல்யாணமும் நடந்துள்ளது. நல்ல மருமகள், நல்ல மருமகன் ஆகிய பலனையும் சந்தித்துள்ளனர். ராகு-கேது இவற்றுக்கு துணை செய்வதுபோலவும் ஆதரவு காட்டுவது போலவும் 2-ஆம் இடத்து குருவும், 7-ஆம் இடத்துச் சனியும் நல்ல இடத்தில் இருந்து நல்ல இடங்களைப் பார்த்தார்கள்.

ஏற்கெனவே கேது இருந்த மூன்றாமிடம் அற்புதமான இடம்- யோகமான இடம். அதேபோல் 9-ல் இருந்த ராகுவும் பாக்ய ஸ்தானத்தில் நின்றவர், மீன ராசிக்கு 7-ஆம் இடம், 3-ஆம் இடம், 11-ஆம் இடங்களையும் பார்த்தார். திருமணம், செய்தொழில், உபதொழில், மனைவியின் பேரில் சொத்து சுகம், ஃபிக்ஸட் டிபாசிட், சேமிப்பு, தங்க ஆபரண அணிகலன் சேர்க்கை, தங்க சேமிப்புத் திட்டம், மனைவி வழி- கணவன் வழி உறவினர்களுடன் நல்லுறவு, பழைய பகைகளை மறந்து நட்பு பாராட்டுதல் போன்ற பலன்களை அனுபவித்தார்கள். ஒரு சிலர் தெய்வ ஸ்தல யாத்திரை, புனிதப் பயணம் மேற்கொண்டனர். சிலரின் மனைவிகளுக்கு கிட்னி, இதயம் சம்பந்தமான பிரச்சினைகள் ஏற்பட்டு, தீவிர சிகிச்சை மேற்கொண்டு, சென்னை, வேலூர் போன்ற இடங்களுக்கும் சென்று மருத்துவ சிகிச்சைசெய்து அபாய கட்டத்தைத் தாண்டி விட்டார்கள். இனி எந்த பயமும் இல்லை என்ற ஆறுதலான செய்தியைக் கேட்டு நிம்மதியடைந்தார்கள். காசு பணம் செலவு ஆகிவிட்டாலும் பெரும் பாதிப்பில் இருந்து தப்பிவிட்டதாக ஒரு திருப்தி! அதையும் 7-ஆம் இடத்தைப் பார்த்த ராகுவும் ரிஷப குருவும் தந்தார்கள்.

3-ஆம் இடத்தைப் பார்த்த ராகு சகோதர ஒற்றுமை, நண்பர்கள் வகை உதவி, உடன் பிறப்புகளால் அல்லது அவர்களது வாரிசுகளால் நன்மை ஆகிய பலனையும் செய்தார். ஒரு சிலரின் அனுபவத்தில், போதைக்கு அடிமையாகி அண்ணன்-தம்பி உறவு எல்லாம் வேஷம் மோசம் என்றும்; வாய்க்கு வந்தபடி வசைபாடி வெறுப்பேற்றிய நிலையில், தான்செய்த தவறுகளை உணர்ந்து மன்னிப்புக் கேட்டதுண்டு. பழக்கவழக்கங்களைக் கட்டுப்படுத்தி ஒழுக்கமாக மாறியதும் உண்டு. உடன்பிறப்புகள் ஒத்துப்போனாலும் அவர்களுக்கு வாய்த்தவர்கள், எரியும் நெருப்பில் எண்ணெய் ஊற்றியது போல பிரிந்த குடும்பத்தைச் சேரவிடாமல் கோள் மூட்டி குடும்பத்தில் குழப்பங்களை உருவாக்கியதும் உண்டு. அது கேதுவின் வேலை. அந்தக் கேது 3-ல் இருந்ததால் உடன்பிறப்புகள் வகையில் விளையாடியது. ஒரு சிலருக்கு நல்ல மருமகன், நல்ல மருமகள் என்று சந்தோஷப்பட்டாலும், அந்த சந்தோஷத்தை முழுமையாக அனுபவிக்க முடியாமல், சம்பந்தக்காரர்களின் சதிகளுக்கு ஆளாகி சஞ்சலத்தை உண்டு பண்ணிய அனுபவத்தையும் தந்தது, அதுவும் கேதுவின் வேலை.

7-ஆம் இடத்தில் இருந்த சனியும், 7-ஐப் பார்த்த ராகுவும், 7க்கு 8-ல் மேஷத்தில் இருந்த குரு பலனாக- ஒருசிலருக்கு அல்லது அவர்களுடைய பிள்ளைகளுக்குப் பேசிமுடித்த திருமணமும் நிச்சயதார்த்தமும் நின்று போனது. ஆக, இந்த நவகிரகங்கள் இருக்கிறார்களே, அவர்கள் ஒரே சமயம் நல்லதையும் செய்கிறார்கள்; கெட்டதையும் செய்கிறார்கள். ஒரே தெருவில் மகிழ்ச்சியான திருமணத்தையும் நடத்துகிறார்கள். துக்கமான அழுகை நிகழ்ச்சியையும் நடத்துகிறார்கள்.

அவிநாசியில் சுந்தரர் வந்துகொண்டிருந்தபோது, அக்ரஹாரத்தில் ஒரு வீட்டில் மங்கள வாத்தியம் முழங்க பூணூல் அணியும் விழா நடக்கிறது. அதற்கு அடுத்த வீட்டில் பெற்றோரின் அழுகைச் சத்தமும் கேட்கிறது. சுந்தரர் விசாரிக்கிறார். பூணூல் விழா நடக்கும் பையனும் தங்கள் ஒரே பையனும் சில ஆண்டுகளுக்கு முன்பு ஆற்றில் குளிக்கப்போன சமயம், தமது பையனை முதலை விழுங்கி விட்டதாகவும்; அவன் உயிரோடு இருந்திருந்தால் இப்போது அவனுக்கும் பூணூல் விழா நடந்திருக்கும் என்றும் கதறுகிறார்கள். உடனே சுந்தரர் அவிநாசியப்பனை வேண்டி ஆற்றுக்குப் போய் அற்புதத் திருமுறைப் பதிகம் பாடுகிறார். முதலை உண்ட பாலகன் பல ஆண்டுகளுக்குப் பிறகு அதே வளர்ச்சியுடன் மீண்டு வருகிறான். இப்போது சுந்தரர் மாதிரியும் ஞானசம்பந்தர் மாதிரியும் அப்பர் மாதிரியும் ஆற்றல் பெற்ற அடியார்கள் இல்லையே! என்ன செய்வது? அப்படிப்பட்டவர்கள் இருந்தால் கோவில் உண்டியல் திருடர்கள் அப்போதே தண்டனைக்காளாவர்களே! காவியுடையில் காமக்களியாட்டம் போடும் ஆதீனங்களுக்கு கண்ணவிந்து போயிருக்குமே! அடுத்தவன் சொத்தை அபகரிக்கும் அநியாயக்காரர்களுக்கு வாதம், வலிப்பு நோய் வந்திருக்குமே!

அப்பர் சுவாமிகளும், வள்ளல் பெருமானும், "நாத்திகம் பேசும் நாத்தழும்பு ஏறியவர்கள்' என்றும், "நாத்திகம் பேசும் நாக்கு முடை நாக்கு' என்றும் பாடுகிறார்கள்! ஆனால் ஒன்று-என்றுமே பொய்யும் புரட்டும் நிலைத்து நிற்காது; நீடித்து ஆட்சி செய்யாது. சத்தியமே ஜெயிக்கும்; வாய்மையே வெல்லும்.

அது சரிதான்! ஆனால் குருக்களைக் கடித்த நாய் நரகத்துக்குப் போகிறதா சொர்க்கத்துக்குப் போகிறதா என்ற ஆராய்ச்சி பிறகு. இப்போது குருக்கள் தொப்புளைச் சுற்றி பத்து ஊசி போடும் வலி குருக்களுக்குத்தானே தெரியும் என்கிறீர்களா! அங்கேதான் கிரகங்களின் தசாபுக்தி வேலை செய்கிறது.

8-ஆம் இடத்துக்கு வந்திருக்கும். ராகுவும், அவரோடு சேர்ந்துள்ள அட்டமத்துச் சனியும், 2-ஆம் இடத்துக்கு வந்திருக்கும் கேதுவும் மீன ராசிக்காரர்களுக்கு என்ன செய்யப் போகிறது என்பதைக் கவனிப்போம்.

8-ஆம் இடம் என்பது கெட்ட ஸ்தானம். சஞ்சலம், ஏமாற்றம், விபத்து, பீடை, கௌரவ பங்கம், விசனம், கவலை, இழப்பு ஆகியவற்றைக் குறிக்கும் இடம். இவற்றில் சுபகிரகம் வந்தால் அவற்றை வளர்ப்பார். பாபகிரகம் வந்தால் அவற்றைக் கெடுப்பார். இயற்கையில் பாபகிரகம் ஆகிய ராகு அந்த பாப ஸ்தானத்தில் வருவதால் அந்த பாபத்தன்மைகளை விரட்டியடிப்பார் அல்லது அழித்து விடுவார் என்று சொல்லலாம். கெட்ட இடத்தில் வந்தி ருக்கும் கெட்ட கிரகம் கெட்ட பலன்களைக் கெடுப்பதால் நன்மை உண்டாகும். கெட்டவன் கெட்டிடில் கிட்டிடும் நன்மை! டபுள் மைனஸ்= பிளஸ்.. குளத்திலே உள்ள மீன்கள் தங்கள் உணவுக்காக அழுக்குகளைச் சாப்பிடுவதால் குளம் சுத்தப்படுவது மாதிரி! 

அதனால் 8-ல் இருக்கும் ராகு நிச்சயம் உங்கள் பெருமை, திறமை, செயல்பாடுகளைக் கெடுக்கமாட்டார் என்பதை நம்பலாம். அதனால் உங்களுக்கு பிணி, பீடைகள் ஏற்பட்டாலும் நிவர்த்தியாகும். ஏமாற்றம், இழப்பு ஏற்பட்டாலும் ஈடுசெய்யப்படும். கௌரவ பங்கத்தை உருவாக்கும் விமர்சனங்கள் பேசப்பட்டாலும், களங்கம் கற்பிக்கப்பட்டாலும், குற்றமற்றவர் என்றும் நிரபராதி என்றும் நிரூபிக்கப்படும். கவலையும் விசனமும் அகற்றப்படும்.

அதேசமயம் அவருடன் சேர்ந்துள்ள அட்டமச்சனி என்ன செய்வார்? அவரும் ஒரு பாபகிரகம்தானே- கெட்ட கிரகம்தானே? அவர் 8-ல் இருந்தால் அந்த எட்டாமிடத்துக் கெட்ட பலனைக் கெடுத்து நல்ல பலனாக மாற்றியமைக்க மாட்டாரா? ராகுவும் கேதுவும் எப்போதும் கெட்ட கிரகங்கள்தான். ஆனால் சனி அப்படிப்பட்டவரல்ல. ஒருசில ராசிக்கு சனி நல்லவர்; ஒரு சில ராசிக்கு கெட்டவர். ரிஷப ராசி, துலா ராசிக்கு அவர் ராஜயோகாதிபதி. மிதுன ராசி, சிம்ம ராசிக்கு நல்லவரும் ஆவார்; கெட்டவரும் ஆவார். இப்படி சந்தர்ப்பம்போல சனி நல்ல ஆதிபத்தியமும் கெட்ட ஆதிபத்தியமும் பெறுவதால் முழுக்க முழுக்க நல்லவர் என்றும் ஏற்றுக் கொள்ள முடியாது; முழுக்க முழுக்க கெட்டவர் என்றும் ஒதுக்கமுடியாது. அதனால்தான் ஏழரைச் சனியும் அட்டமச் சனியும் சிலருக்கு நல்லதும் செய்கிறது; சிலருக்கு கெட்டதும் செய்கிறது. இது அனுபவ ரீதியான உண்மை.

அந்த அடிப்படையில் மீன ராசிக்கு 8-ல் வந்துள்ள அட்டமச்சனி நல்லது செய்யுமா? கெட்டது செய்யுமா? மீன ராசிக்கு 12-க்குடையவர் என்பதால் அவர் 8-ல் மறைவது நல்லது. 11-க்குடையவர் என்பதால் அவர் 8-ல் மறைவது கெட்டது. இதிலும் ஒரு விதிவிலக்கு உண்டு. 12-க்குடையவர் 12-ஆம் இடத்துக்கு (கும்பத்துக்கு) திரிகோணத்தில் இருக்கிறார். எனவே 12-ஆம் இடத்தை உருவாக்கி ஜென்ம ராசிக்கு (உங்களுக்கு) கெடுதல் பண்ணுவார். 12 என்பது விரயம், இடப்பெயர்ச்சி, செலவு, அயன சயன போகம் ஆகியவற்றைக் குறிக்கும். அதாவது இடமாற்றம், குடியிருப்பு மாற்றம். 10-ஆம் இடத்தையும் 5-ஆம் இடத்தையும் சனி பார்ப்பதால் தொழில், உத்தியோக வகையில் இடமாற்றம், ஊர்மாற்றம் ஏற்படலாம். பிள்ளைகளுக்கு வேலை, குடியிருப்பு சம்பந்தமாக இடம் மாறுவதால், அவர்கள் பொருட்டு நீங்களும் இடம் மாறலாம். சில பிள்ளைகள் வெளிநாட்டில் போயிருப்பார்கள். அவர்கள் விருப்பப்படியோ அல்லது அவர்களுக்கு பேறுகாலம் அல்லது வைத்தியம் பார்க்க உதவியாகவோ பெற்றோர்களும் சிறிது காலம் அங்கு போய் தங்கியிருக்கலாம். அதுவும் இடப்பெயர்ச்சிதான்.

சிலர் உள்ளூரில் வீடு வாங்கியிருந்தாலும் வெளியூரில் குறைந்த எஸ்டிமேட்டிலும் வீடு வாங்கலாம். அதுவும் கடன்தான். ஒரு வீட்டை வாடகைக்கு விட்டுவிட்டு மாதத் தவணைக்கடனை அடைக்கலாம். இன்னும் சிலர் புதுக்கடன் வாங்கி மாடியில் வீடுகட்டி வாடகைக்கு விடலாம். அல்லது பெரியவர்களுக்கு சொந்த வீடு இருந்தாலும் மகனுக்கோ மகளுக்கோ புதுவீடு, புது இடம் வாங்கலாம். இவையெல்லாம் நல்ல செலவு என்றாலும், மாதாமாதம் தவணை கட்ட வேண்டும், வட்டி கட்டவேண்டும் என்பது "ரிஸ்க்'கான சமாச்சாரம்தானே. கவலைதரும் விஷயம்தானே! தவறாமல் செலுத்தி நாணயத்தைக் காப்பாற்ற முடியுமா என்பதும் கவலைதரும் விஷயம்தானே!

2-ஆம் இடத்தில் வந்திருக்கும் கேதுவும் அவரைப் பார்க்கும் சனியும் ராகுவும் குடும்பத்தில் சுபமங்கள நிகழ்ச்சிகளை நடத்திவைப்பார்கள். விரயாதிபதி சனி 2-ஆம் இடத்தைப் பார்ப்பதால், அது சுபச்செலவுதானே - சுபவிரயம்தானே! 2-ஆம் இடம் வாக்கு, தனம், வித்தை, கல்வி, குடும்பம், நேத்ரம் ஆகியவற்றைக் குறிக்கும் இடம். சிலர் படிப்புக்காக செலவழிக்கலாம்.. சிலருக்கு கண் ஆபரேஷன் சம்பந்தமான செலவு வரலாம். 2-ல் கேது நிற்பதால் சிலர் ஜோதிடம், வைத்தியம், மாந்திரீகம், அருள்வாக்கு சொல்லலாம். அதன் மூலமாக பொருளும் புகழும் பேரும் பெருமையும் அடையலாம்.

4-ஆம் இடத்தையும் 8-ஆம் இடத்தையும் பார்க்கும் கேது 12-ஆம் இடத்தையும் பார்ப்பதால் பூமி, வீடு, இடம் சம்பந்தமான செலவுகளும் ஏற்படும். ஜாதக தசாபுக்திகள் பாதகமான இருந்தால் வாங்கிய இடத்தால் வில்லங்கம், பிரச்சினை, கட்டிய வீட்டிலும் பக்கத்து இடத்துக்காரனால் பிரச்சினை. எந்தப் பிரச்சினையும் இல்லாவிட்டாலும் வீடு கட்டிவிட்டார்கள், கார் வாங்கிவிட்டார்கள் என அண்ணன்-தங்கை, அக்காள்- தம்பி என்று பழகியவர்களும் பொறாமைப்படுவார்கள். தினசரி வந்து காபி டீ குடித்துவிட்டு அளவளாவிவிட்டுப் போனவர்களும், ஒரு நாளைக்கு பத்து முறை தொலைபேசியில் தொடர்பு கொண்டவர்களும் காரணம் இல்லாமல் வாயடைத்துப்போனவர்கள் மாதிரி வரமாட்டார்கள்; பேசமாட்டார்கள். குடியிருக்கும் பூர்வீக வீட்டில் பங்கு கேட்டு பங்காளிகள் சிலர் பிரச்சினை பண்ணுவார்கள். இதில் வேடிக்கை என்னவென்றால், பங்காளிகள் ஒருவீட்டுக்கு இரண்டு மூன்று வீடு வசதியாக வாழ்கிறவர்களும் உங்களோடு போட்டி போட்டுக்கொண்டு பேச்சுவார்த்தை இல்லாமல் இருப்பார்கள். உங்களுக்கென்று வேறு சொந்த வீடும் இருக்காது. வேறு இடமும் வாங்கியிருக்கமாட்டீர்கள். இதுதான் அட்டமத்துச் சனியின் விளையாட்டு.

இந்த வேதனையும் சோதனையும் குரு ரிஷபத்தில் இருக்கும் வரைதான். பிறகு குரு மிதுன ராசிக்கு மாறியதும் சனியைப் பார்க்கப்போவதால், குருபார்வை கோடி நன்மை என்பது போல எல்லாப் பிரச்சினைகளுக்கும் தீர்வு கிடைக்கும். ராசிநாதன் என்ற முறையிலும் குருவுக்கு ஒரு தனிச்சிறப்பு உண்டு.

ராகு 3-ஆம் பார்வையாக 6-ஆம் இடத்தைப் பார்க்கிறார்; 7-ஆம் பார்வையாக 2-ஆம் இடத்தைப் பார்க்கிறார்; 11-ஆம் பார்வையாக 10-ஆம் இடத்தைப் பார்க்கிறார்.

6-ஆம் இடத்தைப் பார்க்கும் ராகு நோயையும் தருவார்; கடனையும் கொடுப்பார்; சத்துரு, போட்டி பொறாமைகளையும் உருவாக்குவார். ஆனாலும் இந்த 6-ஆம் இடத்துக் கெடுதல்களையும் அவரே போக்குவார். பொதுவாக நோய் என்பது பல வகையில் ஏற்படும். கிரக ரீதியாகவோ, இயற்கை மாற்றத்தாலோ, உணவுப் பழக்க வழக்கத்தாலோ ஏற்படலாம். சில நோய் முன்ஜென்ம வினைப்பயனாலும் அல்லது செய்வினைக் கோளாறினாலும் வரலாம். சிலர் சர்ப்பத்தை அடித்துக் கொல்லுவதால் நாகதோஷம் வரலாம். பாம்புப் புற்றை இடிப்பதாலும் ஏற்படலாம். இதனால் சிலருக்கு சருமநோய், தோல்வியாதிகள் ஏற்படலாம்.

சில நோய் வைத்திய சிகிச்சையால் தீரும். சில நோய் பிரார்த்தனை பலத்தால் தீரும். சில நோய் பரிகார பூஜையால் தீரும். ஆயுள் தீர்க்கமாக இருந்தால் பரிகாரமும் பூஜையும் பிரார்த்தனையும் காப்பாற்றும். இல்லாவிட்டால் விதி ஜெயித்துவிடும்.

கல்விக்கு சரசுவதி- செல்வத்துக்கு லட்சுமி- வீரத்துக்கு பார்வதி என்பதுபோல ஆரோக்கியத்துக்கு தன்வந்திரி பகவான்! நோயுள்ளவர்கள் தன்வந்திரி பகவானை வழிபட்டாலும், அவர் மந்திரத்தை தினசரி எழுதினாலும் ஜபித்தாலும் நோய் குணமாகும். உலக மக்கள் அனைவரும் நோயற்று ஆரோக்கியமாக வாழவேண்டும் என்ற ஒரே குறிக்கோளுடன் வாலாஜாபேட்டை அருகில் தன்வந்திரி ஆரோக்கிய பீடம் நிறுவி, ஏழு அடி உயரத்தில் தன்வந்திரி சுவாமியையும் நிறுவி, டாக்டர் ஞானகுரு முரளீதர சுவாமிகள் 365 நாளும் ஹோமம், ஜபம் ஏற்பாடு செய்து மக்களுக்கு நல்லது செய்து வருகிறார். சுமார் 50 கோடி மந்திரங்களை ஜாதிமதபேதமின்றி அனைத்து சமயத்தாரும் எழுதியனுப்ப, அதையே சிலையின் பீடத்தின் அடியில் மந்திரப்பிரதிஷ்டையாக அமைத்திருக்கிறார். அதுமட்டுமல்ல; யாருக்கு என்ன தேவையோ என்ன பிரச்சினையோ அத்தனைக்கும் ஒரே இடத்தில் தீர்வு கிடைக்கும் வண்ணம்  63 சந்நிதிகளையும் உருவாக்கி ஐதீகப்படி முறைப்படி ஜபதபம், ஹோமம், பூஜைகள் நடந்து வருகிறது. மனித வாழ்க்கையில் உள்ள சங்கடங்கள் யாவும் நீங்குமளவு எல்லா தெய்வ சந்நிதிகளும் உண்டு. வாஸ்துகுறை நிவர்த்தியாக  உலகத்திலேயே வாஸ்துவுக்கு என்று தனிச் சந்நிதி இங்குமட்டுமே இருக்கிறது. தெய்வ சந்நிதி மட்டுமல்ல; சித்தர்கள் பீடமும் அமைக்கப் பட்டுள்ளது. உலக சித்தர்களின் அருளையெல்லாம் ஒன்று திரட்டி இங்கு அருள் பாலிக்குமாறு செய்திருக்கிறார். கிரகங்களினால் ஏற்படும் எல்லாப் பிரச்சினைகளும் இப்படி தெய்வ வழிபாட்டி னால்தான் தீரும்.

பூரட்டாதி நட்சத்திரக்காரர்களுக்கு:

பூரட்டாதி குருவின் நட்சத்திரம். குரு உங்கள் ராசிநாதன் மட்டுமல்ல; தொழில் ஸ்தானாதிபதி- வாழ்க்கை ஸ்தானாதிபதி 10-க்குடையவர். இந்த ராகு- கேது பெயர்ச்சியால் குரு வீட்டை ராகு பார்ப்பதால், சனியும் பார்ப்பதால் தொழில் மேன்மை, வாழ்க்கை முன்னேற்றம், செல்வாக்கு, பெருமை, திறமை, பாராட்டு, பரிசு ஆகிய எல்லா நன்மைகளையும் உருவாக்கும். உலகம் முழுவதும்கூட உங்கள் புகழ் பரவும். குடும்பத்தில் அனைவரின் ஒத்துழைப்பும் உங்களுக்கு பக்கபலமாக அமையும். வேறு எந்தக் குறையும் இல்லை. காரைக்குடி செஞ்சை பகுதியில் நடராஜா தியேட்டர் அருகில் நாகநாத சுவாமி கோவில் வெளிப்புறத்தில் அட்டமாசித்தி தட்சிணாமூர்த்தி சந்நிதி இருக்கிறது! அதேபோல திருப்பத்தூர் கண்டரமாணிக்கம் அருகிலும் பட்டமங்கலம் என்ற ஊரில் அட்டமாசித்தி தட்சிணாமூர்த்தி கிழக்கு நோக்கிய சந்நிதியில் அமர்ந்து அருள் பாலிக்கிறார். அங்குசென்று வழிபட்டு வந்தால் எல்லா விமோசனமும் ஏற்படும்.

உத்திரட்டாதி  நட்சத்திரக்காரர்களுக்கு:

உத்திரட்டாதி சனியின் நட்சத்திரம். சனி 11, 12-க்கு அதிபதி. அவருடன்தான் ராகு சேர்ந்திருக்கிறார். எனவே ராகு- கேது பெயர்ச்சி உங்களுக்கு லாபம், வெற்றி, தேக சுகம், ஆயுள் தீர்க்கம், மக்களுக்கு நல்லகாரியம், தொழில் வளர்ச்சி, புது முயற்சி, செல்வாக்கு, பொன் பொருள் சேர்க்கை, ஆடை ஆபரணச் சேர்க்கை, மக்கள் மத்தியில் பாராட்டு ஆகிய நன்மைகள் உண்டாகும். சிலருக்கு கடல் கடந்து வெளிநாட்டில் பாராட்டு, மதிப்பு, மரியாதை ஆகிய பலன்களும் உண்டாகும். நாமக்கல் அருகில் சேந்தமங்கலம் சென்று தத்தாத்ரேயரையும், குருநாதர் ஜீவசமாதியையும், தண்டபாணியையும், சனீஸ்வரரையும், ஆஞ்ச நேயரையும், பஞ்சமுக விநாயகரையும் தட்சிணாமூர்த்தியையும், வனதுர்க்கையையும் வழிபடவேண்டும். பதினெட்டுப்படிகள் கடந்து ஐயப்பன் சந்நிதியும், கருப்பரும் உண்டு.

ரேவதி  நட்சத்திரக்காரர்களுக்கு:

ரேவதி புதன் நட்சத்திரம். புதன் 4, 7-க்குடையவர். இந்த ராகு- கேது பெயர்ச்சி தேக சுகம், சௌக்கியம், பூமி, வீடு, வாகன யோகம், கல்வி யோகம், பட்டம், பதவி, தொழில் மேன்மை, புதுமுயற்சி வெற்றி ஆகிய எல்லா நன்மைகளையும் தரும். வேலை இல்லாதோருக்கு வேலை, தொழில் இல்லாதோர்க்கு தொழில் அமைப்பும் உண்டாகும். சிலருக்கு தாய்வழி சொத்துகள் கிடைக்கும். விழுப்புரம் மாவட்டம் சங்கராபுரம் அருகில் திருவரங்கம் என்ற ஸ்தலத்தில் ஆதிரங்கநாதர் கோவில் உள்ளது. ஸ்ரீரங்கம் ரங்கநாதரின் சந்நிதிக்கு முந்திய சந்நிதி என்பது ஐதீகம். ஸ்ரீரங்கத்தில் பள்ளி கொண்ட பெருமாளாகக் காட்சியளிப்பது மாதிரியே இங்கும் காட்சியளிக்கிறார். இதேபோல புதுக்கோட்டை மாவட்டம், திருமயத்திலும் (கோட்டைக் கோவிலில்) பள்ளிகொண்ட பெருமாள் காட்சியளிக்கிறார். திருவனந்தபுரம் பத்மநாபசுவாமி கோவிலில் உள்ள மாதிரி அருள்பாலிக்கிறார். சென்று வழிபடலாம்.

கும்பம் (அவிட்டம் 3-ஆம் பாதம் முதல், சதயம், பூரட்டாதி 3-ஆம் பாதம் முடிய)

கும்பம்
(அவிட்டம் 3-ஆம் பாதம் முதல், சதயம், பூரட்டாதி 3-ஆம் பாதம் முடிய)

கும்ப ராசி அன்பர்களே!
கும்ப ராசிக்கு இதுவரை 10-ல் இருந்த ராகு இப்போது 9-ல்  துலா ராசியிலும்; இதுவரை 4-ல் இருந்த கேது 3-ல் மேஷ ராசியிலும்  மாறியிருக்கிறார்கள்.

ராசிநாதன் சனி மூன்றாண்டு காலமாக 8-ல் நின்று உங்கள் தலையில் குட்டிக்கொண்டே இருந்தவர் இப்போது 9-ல் உச்சனாக மாறியிருக்கிறார். 2-க்குடைய குரு 11-க்கும் உடையவராகி 4-ல் அமர்ந்துள்ளார். குருவுக்கு 4-ஆம் இடம் சுமாரான இடம்தான் என்றாலும், 2-க்குடையவர் 10-ஆம் இடத்தைப் பார்ப்பதால் தொழில், வருமானத்தில் தடையில்லை. எனவே முக்கியமான மேற்கண்ட கிரகங்கள் கோட்சார ரீதியாக நல்லபடியாக சஞ்சரிப்பதால் ராகு- கேது பெயர்ச்சியும் உங்களுக்கு நல்லதாகவே அமையும்.

கடந்த மூன்றாண்டு காலமாக கும்ப ராசிக்கு அட்டமச்சனி நடந்த காரணத்தால் பலருடைய வாழ்க்கையில் எல்லாம் இருந்தும் எதுவுமே இல்லாமல் போனதுமாதிரி கஷ்டங்களே நிரம்பி இருந்தது. சாப்பாடு, துணிமணி, தங்கும் இடவசதிக்கு கேடு கெடுதி ஏற்படவில்லையென்றாலும், கொடுக்கல்- வாங்கல், வரவுசெலவு, பழைய கடன்பாக்கி ஆகியவற்றால் வாக்கு நாணயத்தைக் காப்பாற்ற முடியாதபடி சோதனைகளும் வேதனைகளும் நிறைந்திருந்தது. சொந்த வீட்டில் குடியிருந்தாலும் யாரோ வேற்று இடத்தில் விருந்தாளி வீட்டில் இருந்தமாதிரி ஒரு அனுபவம். சாப்பாட்டுக்குப் பஞ்சமில்லை என்றாலும், குடும்பத்தில் அம்மாவோ, மற்றவர்களோ எப்போது சாப்பிடக் கூப்பிடு கிறார்களோ, அப்போது போய்த்தான் சாப்பிட உட்கார வேண்டியநிலை. ஏதோ முக்கிய வேலையாக வெளியில் போய்விட்டாலும், இரவு 10 மணிக்குமேல் வீட்டுக்கதவைத் தட்டமுடியாதபடி ஒரு கட்டுப்பாடு. இதற்காகவே வெளியில் நண்பர் இடத்தில் அல்லது கோவில் மண்டபத்தில் இரவுப் பொழுதைக் கழிக்கவேண்டிய கட்டம்! கல்யாணம் காட்சி ஆகாதவர்களுக்கும் இந்த நிலைதான். பெண்டு பிள்ளைகள், மனைவி, மக்கள் இருப்பவர்களுக்கும் இந்த நிலைதான். மனைவி, குடும்பம் இருந்தவர்களுக்கும், "ஏங்க, அப்படியென்ன வெட்டி முறிக்கிற வேலை ராத்திரி 12 மணி வரை? காலாகாலத்தில் வீடுவந்து சாப்பிட்டு படுக்கக்கூட உங்களுக்கு முடியவில்லையா? நாய்க்கு வேலையில்லை என்றாலும் நிக்கத்தான் நேரமில்லை என்ற மாதிரி ஊரை சுற்றுகிறீர்களே!' என்று மனைவியிடம் வாங்கிக் கட்டிக்கொண்டவர்களும் உண்டு.

மாதாமாதம் வாங்கிய சம்பளத்தை டீ செலவுக்குக்கூட எடுத்துக் கொள்ளாமல் அப்படியே கவரோடு கொண்டுவந்து வீட்டில் கொடுத்தவர்களுக்கே இந்தப் பாடு என்றால், பற்றாக்குறை சம்பளத்தோடு போராடுகிறவர்களுக்கு எந்தப் பாடு? சரி, வீட்டில்தான் இப்படி- வெளியில் எப்படி? வேலை செய்யும் இடத்தில் குற்றம் கண்டுபிடித்தே குறைசொல்லித் திட்டும் மேலதிகாரிகள் சிலர்! எவ்வளவு கவனமாகவும் அக்கறையாகவும் பாடுபட்டாலும் உங்களையும் மீறிய சில தவறுகள்! ஒரு தவறை மறைக்க முயற்சித்தால் பல தவறுகள். பொது இடத்திலும் பொது வேலையிலும் ஆதாயம் ஏதுமில்லாமல் இலவசமாக தொண்டு உணர்வாகப் பாடுபட்டாலும், ஆதாயம் பார்க்கமுடியாத சிலர் கடுப்பாகி உங்களைப்பற்றி இல்லாததும் பொல்லாததும் சொல்லி விமர்சனம் செய்யக்கூடும். அப்படிப்பட்டவர்கள் மத்தியில் சிக்கி சீரழிவதற்கு பதில் நமக்கெதற்கு இந்த வம்பு? யார் எப்படிப்போனால் நமக்கென்ன என்று விரக்தியடைந்து கையைக் கழுவிவிட்டு நழுவ நினைப்புகள் தோன்றும்.

இப்படி சொந்தக் குடும்பத்திலும் சரி; சுற்றுச் சூழ்நிலையிலும் சரி- ஒவ்வொரு நாளையும் ஒவ்வொரு டென்ஷனோடு போக்கியவர்களுக்கு சனிப்பெயர்ச்சியும், ராகு-கேது பெயர்ச்சியும் ஆறுதலும் தேறுதலும் ஏற்படும்படி நல்ல மாறுதல்களை ஏற்படுத்தும்.

பொதுவாக 3, 6, 11-ஆம் இடங்கள்தான் ராகு- கேது, சனி போன்ற அசுப கிரகங்களுக்கு உகந்த இடங்கள். கேது 3-ல் இருப்பது உத்தமம். சனியும் ராகுவும் 9-ல் அல்லவா இருக்கிறார்கள்? அதனால் எப்படி நன்மை உண்டாகும் என்ற சந்தேகம் எழலாம். சுபகிரகங்களானாலும் அசுபகிரகங்களானாலும் திரிகோணத்தில் உள்ளவர்கள் தீங்கு செய்யமாட்டார்கள்; நன்மையே செய்வார்கள் என்பது சந்திரகாவிய விதியாகும்! அதுமட்டுமல்ல; 3-ஆம் இடத்தில் சனியும் ராகுவும் இல்லையென்றாலும், 3-ஆம் இடத்தைப் பார்ப்பதால்கூட அந்தப் பலன் அவர்களுக்குக் கிடைக்கலாம்! அதாவது 3-ஆம் இடத்துக்கு 7-ல் ராகுவும் சனியும் இருக்கிறார்கள்.

எந்த ஒரு இடத்துக்கும் அதற்கு 7-ஆம் இடம் 180-ஆவது டிகிரி சமசப்தமம் ஆகும். அந்த இடத்தின் நல்லது கெட்டதை அதற்கு 7-ஆம் இடத்தை வைத்தும் நிர்ணயிக்கலாம். பலதீபிகையில் "பாவாத் பாவம்' என்று ஒரு விதி உண்டு. அதாவது 2-ஆம் இடம் என்றால் 2-க்கு 2-ஆம் இடம் என்றும், 3-ஆம் இடம் என்றால் 3-க்கு 3-ஆம் இடம் என்றும், 7-ஆம் இடம் என்றால் 7-க்கு 7-ஆம் இடம் என்றும், 10-ஆம் இடம் என்றால் 10-க்கு 10-ஆம் இடம் என்றும் கணக்கிட்டு பலனை நிர்ணயிக்க வேண்டும். ஆகவே திரிகோணத்தில் உள்ள சனியும் ராகுவும்- 3-க்குடையவராகவோ 3-ல் நின்ற மாதிரியாகவோ கணக்கிட்டு பலன் செய்வார்கள்!

ஏற்கெனவே கும்ப ராசிக்கு 10-ல் விருச்சிகத்தில் நின்ற ராகுவை அட்டமச் சனி பார்வையிட்டதால் 10-ஆம் இடத்து தொழில், வாழ்க்கை, முயற்சிகள் ஸ்தானத்தில் எந்த அனுகூலத்தையும் செய்யவில்லை. இப்போது 9-ல் இருக்கும் சனியும் ராகுவும் 10-ல் இருந்து செய்யத்தவறிய யோகங்களைச் செய்வார்கள் என்று எதிர்பார்க்கலாம்.

9-ஆம் இடம் பூர்வ புண்யஸ்தானம். 5-ஆம் இடமும் பூர்வபுண்ய ஸ்தானம்தான். அதாவது 9-க்கு 9-ஆம் இடம் 5 ஆகும். தெய்வ உபாசனை ஸ்தானம்- தகப்பனார் ஸ்தானம்- பிதுரார்ஜித ஸ்தானம். ஒரு காலத்தில் கூட்டுக் குடும்பத்தில் இருந்த ஒருவர் கல்யாணம் காட்சியில்லாமல் பாகம் பிரிக்காத சொத்துக்களைப் பரிபாலனம் செய்துவந்தார். விவசாயம், குடும்ப நிர்வாகம், தொழில் எல்லாவற்றையும் பார்த்து லாபம் தேடிக்கொடுத்தார். அம்மாவும் சகோதர சகோதரிகளும் லாபத்தை அனுபவித்தார்கள். ஒரு கஷ்டகாலத்தில் எல்லாம் நஷ்டமாகி தலைக்குமேல் கடன் ஆகிவிட்டது. உடன்பிறந்தவர்கள் எல்லாம், "கடனுக்கும் எங்களுக்கும் சம்பந்தம் இல்லை. நீ ஏற்படுத்திய கடனை நீயே அடைத்துக்கொள். அந்தக் கடன்பாக்கிக்காக உன்பங்கு சரியாகிவிட்டது. உனக்கு பங்கு பாகம் ஏதுமில்லை' என்று அம்மாவும் உடன்பிறந்தவர்களும் எல்லா பங்கையும் அவருக்குத் தராமல் பகிர்ந்துகொண்டார்கள். தன் பங்கையாவது கொடுத்தால் அதை விற்று கடனை அடைத்து விடுகிறேன் என்பதற்கும் மற்றவர்கள் ஒப்புக்கொள்ளவில்லை. வயதான அம்மாவுக்குத் துணையாக பூர்வீக வீட்டில் வாடகை இல்லாமல் தங்கலாம் என்று சொல்லிவிட்டார்கள். பொதுக் குடும்பத்தினால் ஏற்பட்ட கடனுக்காக இன்னமும் அவர் வட்டி கட்டிக்கொண்டே வருகிறார். "அண்ணன் என்னடா தம்பி என்னடா அவசரமான உலகத்திலே' என்று பாடியது அவருக்காகத்தான் போலும்!

அப்படிப்பட்டவர்களுக்கெல்லாம் இந்த ராகு- கேது பெயர்ச்சியும் சனிபெயர்ச்சியும் நல்லதொரு திருப்பத்தை ஏற்படுத்தும். தகப்பனார் ஸ்தானத்தில் ராசிநாதன் சனி உச்சமாக இருப்பதால், அவரோடு ராகு சேர்ந்திருப்பதால் உடன்பிறப்புகள் மனமுவந்து உங்கள் கடனை அடைப்பதற்கு உதவி செய்யலாம். அல்லது தாயாருக்குக் கிடைக்கும் பங்கை- மற்ற எல்லாப் பிள்ளைகளும் நல்ல வசதி வாய்ப்பாக குடும்பம், தொழில், சம்பாத்தியம் என்று இருப்பதால்- உங்களுக்குத் தன் பங்கைத் தரலாம். அதை வைத்து பழைய கடன்களை அடைக்கலாம். அல்லது உங்கள் சுயமுயற்சியால் உபவருமானங்களைப் பார்த்து பொதுக்கடன்களை அடைக்கலாம்.

9-ல் உள்ள ராகு கும்ப ராசிக்கு 7-ஆம் இடத்தைப் பார்க்கிறார்; 3-ஆம் இடத்தைப் பார்க்கிறார்; 11-ஆம் இடத்தைப் பார்க்கிறார். 3-ல் கேது ஜென்ம ராசியைப் பார்க்கிறார்; 9-ஆம் இடத்தைப் பார்க்கிறார்; 5-ஆம் இடத்தைப் பார்க்கிறார்.

கும்ப ராசிக்கு 10-ஆம் இடம் விருச்சிகம் தொழில் ஸ்தானம். அதற்கு 10-ஆம் இடம் (10-க்கு 10- பாவாத் பாவம்) சிம்மத்தை ராகு பார்ப்பதால் தொழில், வேலை, உத்தியோகம் ஆகிய நற்பலன்கள் உண்டாகும். சிம்மம் சூரியன் வீடு. சூரியன் ராஜ கிரகம். அரசு உத்தியோகத்துக்குரிய வயது முடிந்துவிட்டாலும் விசேஷ விதிப்படி சிலருக்கு அரசு வேலை திடீர் அதிர்ஷ்டவசமாக அமையும். உதாரணமாக சமீபத்தில் ரயில் விபத்தில் இறந்த குடும்பத்தில், குடும்பத்துக்கு ஒருவருக்கு வேலை கிடைக்கும் என்று மத்திய மந்திரி அறிவித்தார். அதேபோல அரசுப் பணியில் இருக்கும்போது பணி ஓய்வுக்கு முன்னதாகவே அவர் இறந்துவிட்டாலும் அவர் வாரிசுக்கு வேலை கிடைக்கும்!

10-க்கு 12-ல் சனி ராகு இருப்பதால் தொழில், உத்தியோகப் பணியில் சிலருக்கு இடமாற்றம் ஏற்படலாம். அது சுக்கிரன் வீடு- ஜலகிரகம் என்பதால் படித்து முடித்து வேலையில்லாமல் கஷ்டப்பட்டவர்களுக்கு, உள்ளூரில் அல்லது வெளியூரில் அல்லது வெளிநாட்டில் வேலை கிடைக்கும். 10-க்கு 12 என்பது விரயஸ்தானம். கும்ப ராசிக்கு மகரம் 12-ஆம் இடம் என்பதும் விரயஸ்தானம். சனி அதற்குடையவர் என்பதால், வேலைக்காக சிலர் செலவு செய்யும் அமைப்பு உண்டாகும். அரசு உத்தியோகத்தில் இருப்போருக்கு விரும்பிய இடப்பெயர்ச்சியும் அல்லது பதவி உயர்வும் எதிர்பார்க்கலாம்.

ராகு 7-ஆம் இடத்தை (சனியோடு சேர்ந்து) பார்ப்பதால் (7 திருமண ஸ்தானம்) ராசிநாதனோடு சேர்ந்ததால் திருமணத்தடை விலகும். 30 வயது, 40 வயது என்று ஆனவர்களுக்கும் ஆண்களானாலும் பெண்களானாலும் இப்போது திருமணம் கூடிவரும். பலநூறு ஜாதகம் பார்த்தும் வரன் அமையவில்லை யென்றால் ஆண்கள் கந்தர்வராஜ ஹோமமும், பெண்கள் பார்வதிகலா சுயம்வர ஹோமமும் செய்து கலச அபிஷேகம் செய்துகொள்ளலாம்.

கடந்த கால அட்டமச்சனி காலத்தில் கருத்து வேறுபாடு காரணமாக குடும்பத்தைவிட்டுப் பிரிந்தவர்களும், குடும்பப் பிளவை சந்தித்த தம்பதிகளும் மனோன்மணி ஹோமமும் அல்லது காமோகர்ஷண ஹோமமும் அல்லது ஜாதக ரீதியான ஹோமமும் செய்துகொண்டால் பிரிந்த குடும்பம் ஒன்று சேரும். விவாகரத்து பெற்ற தம்பதிகள்கூட இந்த ஹோமத்திற்குப் பிறகு ஒன்று சேர்ந்திருக்கிறார்கள் என்பது அனுபவ ரீதியான உண்மை!

கும்ப ராசிக்கு 11-ஆம் இடத்தை (தனுசுவை) சனியும் ராகுவும் பார்த்த காரணத்தால் உங்களுடைய ஒவ்வொரு செயலிலும் முயற்சியிலும் முன்னேற்றமும் வெற்றியும் உண்டாகும். ஏற்கனவே செய்த முயற்சிகளில் வெற்றியும் இல்லாமல் தோல்வியும் இல்லாமல் கிணற்றில் போட்ட கல்லைப்போல அசைவற்ற நிலையில் எந்தப் பலனும் தெரியாத நிலை இனி மாறிவிடும். அன்று செய்த உழைப்புக்கு இன்று பலன் தெரியும். பலமடங்கு ஆதாயமும் லாபமும் கிடைக்கும். சில வி.ஐ.பிக்களின் தொடர்பும் அறிமுகமும் உண்டாகும். காரிய ஜெயத்துக்காக நீங்கள் செய்த பிரார்த்தனையும் பூஜையும் ஹோமமும் இனிமேல்தான் கைமேல் பலனாகத் தெரியும். எந்த ஒரு பூஜையும் பரிகாரமும் ஹோமமும் வீண்போகாது. ஆனால் அதற்குரிய நேரம் காலம் வரும்போதுதான் அது வேலை செய்யும். அப்படியானால் நேரம் வரும்போது தானாகவே நடக்குமே- பிறகு எதற்குப் பரிகாரம், பூஜை? என்று நீங்கள் கேட்கலாம். நன்றாகப் படிக்கிற மாணவன் பாஸ் ஆவது உறுதிதான். ஆனால் அதில் மெரிட்டில் பாஸ் ஆவதற்கும் பள்ளியில் முதலிடம்- மாநிலத்தில் முதலிடம் பெறவும் ட்யூஷன் வைத்துக்கொள்வதில்லையா?

இரண்டு நண்பர்கள் கோவிலுக்குப் போனார்கள். அதில் ஒருவன், ""நான் உள்ளே வரவில்லை; கோவில் வாசலில் இருக்கிறேன். நீ போய் கும்பிட்டு வா'' என்று சொல்லிவிட்டான். மற்றொருவன் மட்டும் உள்ளே சென்று சாமி கும்பிட்டுத் திரும்பினான். திரும்பும்போது படிதட்டி விழுந்து காலில் சிறு காயம் ஏற்பட்டுவிட்டது. வெளியில் நின்றவனுக்கோ எங்கிருந்தோ பறந்து வந்த நூறுரூபாய் நோட்டு அவன் காலடியில் விழுந்தது. சாமி கும்பிட்டவன் நொண்டி வந்ததைப் பார்த்த கும்பிடாதவன், ""பார்த்தாயா, நீ கும்பிட்டதுக்குப் பலன் காலில் அடி; கும்பிடாத எனக்கு நூறு ரூபாய் பரிசு'' என்று கேலி பேசினான். பக்தனுக்கு வருத்தம். உள்ளே சென்று கடவுள் சன்னதியில், ""இது என்ன நியாயாம்? உன்னைக் கும்பிட்டதற்கு பலன் இதுதானா?'' என்று குமுறினான். அதைக் கேட்ட பூசாரி, ""தம்பி, உனக்கு இன்று பெரிய விபத்து ஏற்பட்டு கால்முறிவு ஏற்பட வேண்டிய கட்டம். சாமிகும்பிட்டதால் லேசான காயத்தோடு தப்பிவிட்டாய். வெளியில் நின்றவனுக்கு இன்று லட்சம் ரூபாய்க்குமேல் பரிசு கிடைக்கவேண்டிய யோகம். அவன் இறைவழிபாடு செய்யாததால் 100 ரூபாயோடு யோகம் குறைந்து விட்டது'' என்றாராம். சில விஷயங்கள் நம் அறிவுக்கு எட்டும். சில விஷயங்கள் நம் அறிவுக்கு அப்பாற்பட்டவையாகிவிடும். இதெல்லாம் தேவரகசியம்! அதிர்ஷ்டமும் யோகமும் இருந்தால் பம்பர் பரிசில் முதல் பரிசு கிடைக்கும். இல்லாவிட்டால் ஒரு நம்பர் வித்தியாசத்தில் இழப்பு ஏற்படும்; ஏமாற்றமாகிவிடும்.

அதேபோல கேது உங்கள் ராசியைப் பார்ப்பதால், உங்கள் செல்வாக்கும் சொல்வாக்கும் மேன்மை அடையும். மற்றவர்கள் உங்களை குற்றம் குறை கூறி குதர்க்கமாகப் பேசினாலும் அதைப் பற்றிக் கவலைப்படவும் மாட்டீர்கள். காதில் போட்டுக் கொள்ளவும் மாட்டீர்கள். மனம் தளராமல் உங்கள் மனம் சொல்லுவது மாதிரி செயல்படுவீர்கள். அது உங்கள் பக்கம் உள்ள நியாயத்தைப் பறை சாற்றும்.

5-ஆம் இடத்தைப் பார்க்கும் கேது உங்கள் எண்ணங்களையும் திட்டங்களையும் செயல்படுத்தும். மகன் அல்லது மகள் வாழ்க்கையில் மகிழ்ச்சி உண்டாகும். திருமணம், வாரிசு, வேலைவாய்ப்பு போன்ற நல்ல காரியம் செயல்படும். சிலருடைய பிள்ளைகள் வெளிநாடு போகலாம். சிலர் தமது உடன்பிறப்புக்கள் வகையிலும் நன்மைகள் நடக்கும். விலை உயர்ந்த ஆபரணம் வாங்கலாம் அல்லது வீட்டுக்குத் தேவையான ஆடம்பரப் பொருள்களை வாங்கிச் சேர்க்கலாம்.

அவிட்ட நட்சத்திரக்காரர்களுக்கு:

அவிட்டம் செவ்வாயின் நட்சத்திரம் செவ்வாய் உங்கள் ராசிக்கு 3, 10-க்குடையவர் என்பதாலும்; செவ்வாயின் வீட்டில் கேது நிற்க ராகு பார்ப்பதாலும் சகோதர சகாயம், நண்பர்கள் உதவி, தொழில் யோகம், புதிய வேலைவாய்ப்பு, தொழில், வேலை, உத்தியோக முன்னேற்றம் ஆகிய திருப்திகரமான பலன்களை எதிர்பார்க்கலாம். புதுக்கோட்டை அருகில் குமரமலை என்ற ஊரில் தண்டாயுதபாணி கோவில் இருக்கிறது. அங்கு சென்று வழிபாடு செய்யலாம். 

சதய  நட்சத்திரக்காரர்களுக்கு:

சதயம் ராகுவின் நட்சத்திரம். எனவே ராகு- கேது பெயர்ச்சி உங்களுக்கு நல்ல யோகத்தையே தரும். குழப்பங்கள் தீர்ந்து குதூகலம் கூடும். தொழில் முயற்சி, வருமானத்தில் நல்ல திருப்பங்கள் ஏற்படும். உள்ளத்தில் மகிழ்ச்சி பொங்கும். வருமானம் தாராளமாக இருக்கும். கும்பகோணம் கொள்ளிடம் வடகரை அணைக்கரையிலிருந்து எய்யலூர் சென்று சொர்ண புரீஸ்வரரை வழிபட வேண்டும். சிதம்பரம்-கடலூர்-எய்யலூர் பஸ்ரூட். 

பூரட்டாதி நட்சத்திரக்காரர்களுக்கு:

ராகு- கேது பெயர்ச்சி தனம், லாபம், குடும்ப மேன்மை ஆகிய பலன்களைத் தரும். சிந்தனை ஆற்றலால் சிறப்பாக செயல்பட்டு சீரும் பெருமையும் அடையலாம். விருப்பங்கள் நிறைவேறும். எதிர்பார்த்தபடி பணம் தேடிவரும். திருப்பத்தூர் அருகில் பட்டமங்கலத்திலும், காரைக்குடி செஞ்சைப் பகுதியிலும் தட்சிணாமூர்த்தி சந்நிதி இருக்கிறது. அங்கு சென்று வழிபடலாம்.